阿媽話放大假會俾公司炒魷
最近《心理追兇》@何遠東 嘅演出好吸引到我, 除咗佢做得好好之外, 呢Part講阿媽過份緊張同埋約束子女嘅故事亦令我有啲感受。
我身邊有個朋友, 年年都手執10幾日大假唔敢放, 我話你再唔放就會冇晒, 因為佢公司係唔俾累積假期去下一年, 而佢就會用一種近乎自殺式嘅方法去用哂啲假---間中放半日, 間中放半日, 陰啲陰啲用晒啲假。你係咪覺得佢好愛公司, 係一名工作狂, 所以先會咁呢? 又或者係咪佢老闆唔批佢放呢? 都唔係, 相反佢老闆仲迫佢清假, 咁點解要咁浪費啲假期呀? 原來背後嘅原因係佢阿媽唔鍾意佢放假, WTF！
佢媽咪係典型老派思想, 後生嘅時候捱得好辛苦, 咁你知嗰啲60、70、80年代嘅人係的確好刻苦耐勞, 不問大假, 真係實幹派死做爛做, 呢種精神絕對值得我哋班後生去學習, 不過時代唔同咗, 我相信而家嘅人工作壓力都好大, 特別係精神方面, 起碼多咗互聯網, 你返屋企都有時要覆email, 甚至老闆同客人嘅whatsapp啦。
喺我朋友媽咪嘅世界同埋角度, 你放假呢, 公司肯肯定會唔鍾意, 有機會得罪老闆而被炒魷, 其實我媽咪都有少少呢種思想, 但冇我朋友媽咪咁激。我最初都會問佢, 點解唔好好利用啲假期去旅行呀, 我朋友就話, 佢媽咪覺得請假去幾日, 甚至十幾日旅行, 公司會趁機炒咗你, 搵個勤力嘅人代替你, 確實係有啲被害妄想症, 可能auntie以前遇過啲衰老闆, 令佢有陰影都唔出奇。
咁點解佢選擇間中放半日去消耗假期呢? 原來佢係會指定請下半晝, 朝早返半日工之後搵同事食lunch, 盡量磨到兩點幾, 然後行下商場, 修下甲, 去到最後就去麥當勞坐, 一直坐到6點幾先返屋企, 要扮到好似正常放工7點鬆啲返到, 咁阿媽就唔會懷疑佢冇返工喇, 坦白講我真係覺得好慘, 特別係4點幾5點喺麥當勞買杯嘢飲坐足兩個鐘呢一幕。
我勸過佢同媽咪解釋, 其實香港地有大假好正常, 呢個係勞工法例, 而基於人道立場, 有時真係需要休息, 或者旅行充充電, 佢話佢明白, 不過同媽咪講一樣會被鬧, 結論都係你唔俾心機做嘢, 成日放假, 公司會唔鍾意, 老闆會炒咗你。
父母愛錫子女係啱嘅, 不過真係要與時並進。
=================
#心理追兇mindhunter #父母愛錫子女 #何遠東
Search